真係黐……線
我唔知自己黐左線定係當局者迷，次次喺電視見親田二少講語文教育嘅嘢，都接受唔到佢係語常會主席，但事實始終係事實，所以我都要接受埋，喺香港，語文教育就係職業訓練嘅一種，所以，禁左廣東話，我地的中文就一定好，我手寫我口呀嗎，中文緊好啦! 所以，一定要殺左廣東話，就從中文堂殺起，再殺出課室殺到走廊，再沿樓梯一直殺落去，殺到球場，再殺到對面馬路個公園……殺殺殺! 真痛快! 好似禁煙法一樣，分階段殺殺殺，仲可以喺公園可以食煙果個角落隔離留返一格講廣東話區……哈哈哈! 殺左廣東話，以後就唔使講正字正音，以後就唔使次次聽到人講「時奸」果陣屎，忍唔住冷笑……我最鬼憎果D寫唔出又打唔到嘅的廣東字，仲有果D係又加「口」唔係又加「口」嘅廣東字，仲有果D成日造字以為自己係倉頡嘅人，仲有仲有，果D寫日文當漢字，將拉麵當成日本嘢嘅人，簡直當我地偉大嘅漢民族冇到……殺呀! 最好盡快殺到報紙八卦雜誌，可以先封膠袋，加埋「奉特區政府諭：廣東話危害國民經濟健康」……
我諗廣東話一定有問題，我平屎去球場打波，大人細路人人都爆粗，問候人地祖宗多個傳波射欖，搞到我唔想再去，球技都生疏晒，我平屎打書面話果陣屎私文好多，一打廣東話就怒火焚身，講嘢真會粗魯好多……真係……黐線!!
真係黐……線!
想當年，一聲愛國都唔使講，就要中英文教學分家，留番少少貴族讀英文中學，有人喊到呼天搶地，高官就話母語點好母乳點好，天水圍居民都話唔公平：點解天水圍冇英中？英乳好定係母乳好？三幾年後，政府就縮沙啦，中中入面又可以開全英文班，又有唔知幾多中中以上車轉英中為終身學習奮鬥目標，轉唔到英中？咁就要轉直資啦，咩乳都得，有錢就得……
連中大都要轉英乳啦，同國際接軌喎，SOR喎，國際係咩班次嘅列車？有軌嘅咩？鬼就有。
母語有咩好？查實，母語係咩呢？我地日講夜講果Ｄ？定係書本寫果Ｄ呢？定係我地寫ＢＬＯＧ寫ＸＡＮＧＡ果Ｄ？SOR 喎，唔知! 總知母乳教學好啦! 不過，今時今日又唔係咁講囉喎，董伯伯話齊，與時並進嘛，國語最好，禁左廣東話佢啦! 成日講廣東話我地點同十幾億同胞溝通吖？台山話潮州話係唔係廣東話？咁禁唔禁？
最後一句：真係黐……線!